Inaanínag ang ilálim ng dágat
Pinagmámasdan mga siréna’t ígat
Pisngí ng túbig–salamín ng b’wa’t bit’wín
Humáhabì ng mga saláwikaín
Kailán matatápos ang paglalakbáy
Sa pagítan ng kamatáyan at búhay?
Matútunton pa ba ang gusì sa dúlo
Kung báwat bahágharì ay naglálahò?
Palakás nang palakás hampás ng álon
Kailán pa kayá itó hihináhon?
May tíbay nga ba ang bangkáng waláng timón
T’wing sásalungat sa ágos ng panahón?
Tánging bantáy ay salapáng ng siyókoy
Katapángan sa ugát ay dumadáloy
Káya bang sisírin ang kailalíman
Úpang ang kaharián ay matagpuán?
Ang ulán ay untí-untí nang pumaták
Páyong–korónang tiník gawá sa pílak
Hímig ng kunéhong-táo’y alingawngáw
Mulá sa buwáya hanggáng bulalákaw
illustration by Love♥Kat
03/07/2021
Note:
A poem consisting of five quatrains of 12-syllable lines, inspired by the music of the English band Echo & the Bunnymen, from 1980’s Crocodiles to 2014’s Meteorites
Glossary:
ígat – eel
timón – rudder
salapáng – trident
